Instituti Demokratik i Kosovës ka kërkuar nga presidentja e vendit që të ofrojë qartësi dhe transparencë lidhur me procesin e caktimit të mandatarit të dytë për formimin e qeverisë.
Në një njoftim për media, KDI ka theksuar se është thelbësore që të gjithë hapat e ndërmarrë nga presidentja të jenë të qartë, transparentë dhe të arsyeshëm, në mënyrë që të ruhet integriteti i procesit dhe besimi publik.
“KDI vlerëson se për të siguruar integritet dhe besueshmëri të këtij procesi, është thelbësore që të gjitha hapat e Presidentes të jenë transparentë dhe arsyeshëm, duke përfshirë publikimin paraprak të kritereve mbizotëruese që do të udhëheqin vlerësimin e ‘gjasës më të madhe për formim të shumicës’, si dhe sqarimin e formës përmes së cilës do të kërkohet dhe verifikohet mbështetja në Kuvend,” thuhet në njoftimin e KDI-së.
Instituti ka shtuar se këto kritere përbëjnë një garanci substanciale për paanshmërinë e procesit dhe respektimin e rendit kushtetues.
“Transparenca lidhur me këto kritere është e rëndësisë parësore për të ruajtur besimin publik në funksionimin demokratik dhe kushtetues të institucioneve,” thuhet më tej në reagimin e KDI-së.
Sipas këtij institucioni, qartësia në veprimet e presidentes është vendimtare për të shmangur çdo paqartësi apo interpretime të ndryshme rreth mënyrës së caktimit të mandatarit të ri për formimin e qeverisë.
