Skuadra e Pejës do të jetë për një kohë të pacaktuar pa kapitenin Dardan Berisha, njërin prej lojtarëve kryesor të ekipit.
Skuadra e Superligës së Kosovës në basketboll, të hënën ka njoftuar se Berisha është lënduar dhe do të mbetet jashtë parketit për një kohë të pacaktuar.
Edhe pse Peja nuk ka bërë të ditur periudhën që do të jetë pa kapitenin, thuhet se Berisha të paktën do të duhet të pauzojë rreth gjashtë javë.
Gjithashtu, Berisha i mungoi Pejës në ndeshjen e fundit ndaj Vëllaznimit, të cilën e humbi në Gjakovë me shifrat 94:85 në kuadër të xhiros së 14-t të elitës së basketbollit kosovar.
Mungesa e Berishës do të jetë e madhe për Pejën, duke pasur parasysh rëndësinë e kapitenit që është dhe mbetet ndër lojtarët kyç të skuadrës.
Këtë sezon, Berisha po luan me një mesatare prej 12 pikëve, 3 kërcimeve e po aq asistimeve për ndeshje në Superligën e Kosovës.
Pas 14-të xhirove të luajtura deri më tani në Superligë, Peja zë vendin e tretë në tabelë me 22 pikë të mbledhura, ku ka regjistruar 8 fitore karshi 6 humbjeve.
