Skuadra e Superligës së Kosovës në basketboll, Bora është bërë me trajner të ri pasi ka ndarë rrugët me bullgarin Lubomir Minchev.
Ekipi nga Prishtina, ka bërë të ditur se tashmë ka angazhuar trajnerin nga Mali i Zi, Zoran Kashqellan, i cili do ta drejtojë skuadrën për pjesën e mbetur të këtij sezoni.
Minchev ishte në krye të Borës vetëm në dy xhirot e para të këtij sezoni, ndërsa në dy ndeshjet e fundit, ekipi u drejtua nga asistenti Lorik Kllokoqi.
Kashqellan do të debutojë në krye të ekipit këtë vikend dhe atë në ndeshjen kundër Trepçës, kampiones në fuqi.
Së fundmi, Kashqellan ka drejtuar ekipin Bosna Sarajevo që ishte pjesëmarrës në Ligën ABA, ndërsa më herët ka qenë trajner edhe i Spars Sarajevo dhe Boracit.
Aktualisht, Bora është ekipi i vetëm që këtë sezon në Superligë ende nuk di për fitore pas katër ndeshjeve të luajtura.
