Tentime patën më shumë, sesa pika të rendit të ditës të përfunduara.
Kështu në tri seanca, deputetët e Kuvendit të Kosovës, gjuhë të përbashkët gjetën në vetëm dy pika.
Të shtunën u miratua votimi i raportit të komisionit të përkohshëm për verifikimin e kuorumit dhe mandateve të deputetëve.
E më pas, të zgjedhurit e popullit u betuan.
Por, megjithëkëtë, seanca u ndërpre menjëherë në pikën pasuese.
ligjvënësit s’u pajtuan për emrin e kryeparlamentarit, me çka dështoi edhe një herë konstituimi i Kuvendit.
Për këtë një seancë tjetër u caktua të hënën në ora 15:00.
“Pas miratimit të raportit dhe pamundësisë së zgjedhjes së kryetarit dhe nënkryetarit, kjo nënkupton që seanca akoma nuk është e përfunduar, prandaj iu mbetet të zgjedhurve të popullit, tashmë me mandat efektiv, që ta tejkalojnë këtë situatë. Në lidhje me afatet, nuk është se përcaktohet qartë brenda cilit afat duhet të përfundoj ky proces, megjithatë është detyrë dhe përgjegjësi e tyre që të tejkalohet kjo situatë, në mënyrë që t’i hapet rrugë themelimi i institucioneve të tjera”, ka thënë Ardian Bajraktari, avokat.
Nëse deputetët të hënën gjejnë gjuhë të përbashkët, hapet rruga për formimin e qeverisë së re.
“Konstituohet Kuvendi, hapet rruga për të rrjedh mandatet kushtetuese, të nenit 95, lidhur me ofertën për mandatim të qeverisë dhe mandatarit, zgjedhjet e qeverisë brenda 15 ditësh nga partia fituese, nëse ai nuk mundet, rrjedh mundësia për partitë e tjera që mund t’i bëj 61 vota në 10 ditët pasuese”, ka thënë profesori Mazllum Baraliu.
Ai tregon se çfarë mund të ndodh nëse pozitë e opozitë, nuk i sigurojnë 61 vota.
“Nëse nuk janë të afta as pozita as opozita, atëherë presidentja e vendit është e obliguar sipas Kushtetutës që në afat prej 40 ditësh t’i shpall zgjedhjet e reja të parakohshme parlamentare”, ka treguar Baraliu.
Seanca e së hënës, është e katërta me radhë, që deputetët mblidhen për ta konstituuar Kuvendin e Kosovës.
