Tre persona janë arrestuar gjatë 24 orëve të fundit, pasi që të njëjtit kanë ushtruar dhunë fizike e psikike ndaj familjarëve të tyre, derisa në Polici janë raportuar vetëm katër raste të dhunës në familje, raporton teve1.info.
Në Lipjan, një grua ka raportuar në Polici se është sulmuar fizikisht nga një person, si dhe e njëjta ka treguar se nga dhuna e ushtruar mbi të ka marrë lëndime dhe është dërguar për tretman mjekësor.Lidhur me këtë ngjarje, e cila ka ndodhur mbrëmë, Policia ka bërë të ditur se i dyshuari është arrestuar dhe pas intervistimit me vendim të prokurorit është dërguar në mbajtje.
Rasti tjetër i dhunës në familje ka ndodhur në qytetin e Fushë-Kosovës, që si pasojë e dhunës psikike nga bashkëshorti i saj një grua është dërguar për tretman mjekësor. Policia në raportin 24 orësh ka njoftuar se për këtë rast hetimet janë duke vazhduar.
Edhe në qytetin e Ferizajt, është arrestuar një person, i cili dyshohet se pas një mosmarrëveshje kishte demoluar shtëpinë dhe kishte kërcënuar viktimën mashkull. I dyshuari me vendim të prokurorit është dërguar në mbajtje.
Ndërsa, rasti i cili ka ndodhur në Prizren ka përfunduar në procedurë rregullt. Në këtë rast, Policia, ka bërë të ditur se një i dyshuar e ka keqtrajtuar fizikisht viktimën femër, por që pas intervistimit rasti ka kaluar në procedurë të rregullt dhe i dyshuari është lënë i lirë.
Ndërkaq, lidhur me një rast të dhunës në familje që ka ndodhur ditë më parë, dorasi është arrestuar dhe pas vendimit të prokurorit është dërguar në mbajtje./teve1.info/
