Edhe katër ditë kanë mbetur deri në thirrjen e seancës ku do të hidhet në votim Qeveria e re.
Presidentja e vendit, Vjosa Osmani mandatoi Glauk Konjufcën për kryeministër, ndonëse ende nuk dihet nëse i njëjti ka votat për t’u zgjedhur.
Mirëpo në anën tjetër, ish opozita, PDK, LDK e AAK veçse kanë bërë të ditur se nuk kanë votë për të.
Propozimi i Vetëvendosjes për Konjufcën, sipas analistit Avni Arifi, është bërë duke u thirrur në qëllimin që dihet se nuk do t’i marrë votat.
“Është në diskrecion të partive politike opozitare të vlerësojnë, por nuk besoj që e kanë bërë Konjufcën mandatar me qëllim të krijoji qeverinë të gjithë e dimë, të paktën njerëz që merren me politike e dimë, nuk e do kryeministër Konjufcën, Albin Kurti por e ka bërë se e din që nuk e votojnë e këta nuk mund të thonë hajt për inati të Kurtit po e votojmë”, deklaroi Arifi.
Arifi thekson se Konjufca nuk pritet të marrë përkrahje, pasi që kabineti është i njëjti me atë që e kishte propozuar Albin Kurti.
“Konjufcës nuk ia kanë dhënë mandatarin, por ata çfarë kanë bërë ia kanë dhënë krejt qeverinë meveti, kjo nuk është votë për Konjufcën, është edhe për Fitore Pacolli ministre, që e ka bërë të pamundshme përkrahjen e partive opozitare”, thotë ai.
Skeptik se ish-kryeparlamentari Konjufca do të zgjidhet kryeminstër është edhe njohësi i politikës, Dorajet Imeri.
Sipas tij, gjasat për zgjedhje të jashtëzakonshme janë më të mëdha se sa për një qeveri të formuar.
“Nuk konsideroj se mund të ketë pritshmëri në seancën e radhës ku do të votohet për shumicën e re parlamentare, përkatësisht për Qeverinë e Republikës së Kosovës unë konsideroj se partitë politike nuk do të lëvizin nga pozicionet e tyre të deklaruara publikisht. Përtej vullnetit individual që mund të kenë deputetët e që ,mund të jenë të shumtë unë konsideroj, partitë partitë politike do ti ruajnë dhe nuk besoj të prodhohet një rezultat tjetër”, thotë analisti Imeri.
Partitë e ish opozitës, deri tani, vazhdimisht kanë bërë të ditur se janë të gatshëm për zgjedhje të reja, duke deklaruar publikisht se nuk do të votojnë as mandatarin e dytë të LVV-së për kryeministër.
