Karateistja Behije Mustafa e ka mbyllur javën e shkuar në mënyrën më të mirë të mundshme, duke fituar medaljen e artë në garën e Serie A në La Coruna të Spanjës.
Niveli Serie A vlerësohet si rang i dytë i garave elitare të karatesë, pas turneve Karate 1 Premier League.
Mustafa në finale të kategorisë deri 68 kilogramë mposhti karateisten e Egjiptit, Jana Hazem Elsayed me rezultat të thellë, 14:6.
Lufta finale u kontrollua plotësisht nga Mustafa që fiton të artën në garën e Serie A, ku pjesëmarrës ishin 1195 garues nga 83 shtete të botës.
Suksesi i Mustafës vlerësohet historik për Kosovën, ndërsa me medaljen e artë të fituar në Spanjë është krenuar si karateistja ashtu edhe trajneri Qëndrim Shaqiri.
