Deputeti i vetëm shqiptar në Parlamentin e Serbisë, Shaip Kamberi, ka njoftuar se nuk do të marrë më pjesë në punimet e këtij institucioni, duke e cilësuar këtë vendim si një reagim të domosdoshëm ndaj përjashtimit sistematik të kërkesave të shqiptarëve të Luginës së Preshevës nga agjenda parlamentare.
“Ka pesë vite që unë jam në detyrë si deputet, përfaqësues i shqiptarëve të Luginës së Preshevës, në një institucion që do të duhej të ishte institucioni më i lartë në Serbi, ku do të duhej të merrej vendimet. Kam nisur disa iniciativa e kam bërë propozime ligjore, në të cilat kisha përmendur ligjin për të drejtat dhe lirive të pakicave, sikurse ligjin për kompetencat e territorin e gjykatave çka kanë të bëjnë me rikthimin e Gjykatës Themelore në Preshevë, krijimin e Prokurorisë së veçantë në Preshevë, krijimin e Gjykatës së Qarkut për Preshevë, Bujanoc dhe Prokurorisë Themelore dhe po ashtu Gjykatës për kundërvajtje. Sikurse një ligj të ri total, komplet, ligjin për mbrojtjen e lirive dhe të drejtave të pakicave që do të ishte konform standardit të Bashkimit Evropian”, tha Kamberi.
Megjithatë, ai theksoi se për më shumë se një vit këto ligje janë mbajtur peng në procedurë pa asnjë mundësi për t’u shqyrtuar apo debatuar në Kuvendin e Serbisë.
“Më tepër se një vit ata po e mbajnë peng. Ligjet janë në procedurë parlamentare, por nuk e kanë dhënë mundësinë as të jenë pjesë e debatit parlamentar. Kjo e shumë të tjera, si dhe kriza aktuale politike janë ndërlidhur që të kemi një vendim të tillë që bashkërisht me partnerët e mi të SDA-së e Sanxhakut nuk e shohim të arsyeshëm të marrim pjesë në punimet e Parlamentit. Edhe pse do të vazhdojmë me kërkesa, propozime të reja, do t’i adresohemi me shkrim ministrive, qeverisë, sikurse edhe presidentit Vuçiq”, deklaroi ai.
Sipas Kamberit, kjo lëvizje është edhe një mesazh drejtuar bashkësisë ndërkombëtare, e cila, sipas tij, nuk ka ushtruar presion të mjaftueshëm ndaj Beogradit për zbatimin e 13 marrëveshjeve të nënshkruara me përfaqësuesit e shqiptarëve të Luginës.
Pavarësisht bojkotit, Kamberi njoftoi se do të vazhdojë t’i adresojë kërkesat dhe propozimet e tij përmes formave zyrtare – përfshirë qeverinë, ministritë dhe presidentin serb Aleksandar Vuçiq.
