Që pesë vite dyert e këtij restoranti janë të mbyllura. Që nga koha e pandemisë Gani Beka nga Prishtina ka vendosur ta ndalë punën në këtë lokal.
Por pavarësisht kësaj, Beka thotë se vazhdon të marrë fatura nga Kompania Rajonale e Ujësjellësit “Prishtina”, ani pse kishte kërkuar pasivizimin e orës së lokalit.
“Unë rregullisht po bëjë kërkesë për me mu pasivizu kjo orë, rregullisht kur vinë inkasantët megjithëse deri tash nuk kanë ardhur që pesë vite me shiku orën. Unë pash një faturë ish ardh pesë euro kur nuk kam qenë në shtëpi e kish lënë faturën tek kutia postale. Është e pa pranueshme me t’i shkru 5 kubik kur nuk punon lokali”, ka thënë Beka.
Madje Beka ankohet edhe për mbi faturim të ujit të shpenzuar në shtëpi.
“Në orë të shtëpisë i kam 80 kubikë, është ardhur inkasanti dhe më ka thënë që duhet me ardh atje me u barazu se përndryshe të qesim të përmbaruesi. Unë nuk po e shoh të arsyeshme që çdo ditë më shku me hup kohë. Më kanë thënë se nuk mundesh me ndalu ti se e ke orën e shtëpisë afër të kësaj të lokalit, unë nëse nuk jam duke punuar kjo mund të konsiderohet edhe si zonë private pse nuk ma shkyçin orën komplet.. unë më nuk kam më shku tek këta përveç që kam me shkyç vet”, ka thënë tutje Beka .
Ai madje thotë se nëse nuk rregullohet ky problem, do të deponojë lëndë edhe në institucionet e drejtësisë.
“Unë i kam fakturat prej fillimi nëse i qes në gjyq ata, qare nuk kanë pa ma pagu dëmshpërblimin përmes gjyqit. Nëse shkojmë përmes gjyqit atëherë duhet të më kthejnë paret se 490 kubikë uji për 15 vjet, a kam paguar mbi 1 mijë kubikë uji nga 10 euro kubikun e ujit”, është shprehur Beka.
Nga “KRU Prishtina” kanë thënë se i njëjti nuk ka kërkuar pasivizim të orës dhe kanë kërkuar që Beka të paraqitet në Zyrën për Konsumatorë.
“Nga të dhënat në program është konstatuar se ky konsumator, më datë 16.02.2021, ka kërkuar barazimin e gjendjes, dhe komisioni ka realizuar këtë barazim duke ia larguar borxhin në vlerë prej 70.89 euro. Kjo shumë është larguar edhe nga kartela financiare. Nuk ka asnjë dëshmi që konsumatori ka kërkuar pasivizimin e kodit. Konsumatori duhet të paraqitet në Zyrën për Konsumatorë këto ditë. Aktualisht, ai po faturohet sipas gjendjes me dëshmi. Po ashtu, kemi komente nga lexuesi për muajin maj dhe qershor, me gjendjen sipas shpenzimeve të ujëmatësit për dy muajt e fundit”, ka thënë zëdhënësja e KRU Prishtinës.
Por sipas dëshmimeve që Beka ka dhënë televizionit, në tetor të vitit 2023, KRU Prishtina kishte refuzuar pasivizimin e orës.
