Deputetja e Aleancës për Ardhmërinë e Kosovës (AAK), Time Kadrijaj, ka mohuar kategorikisht se partia e saj rrezikon të mos e kalojë pragun zgjedhor nëse do të mbaheshin zgjedhjet e ardhshme.
Ajo theksoi se Aleanca është një subjekt i konsoliduar dhe se është në përgatitje edhe për zgjedhjet lokale.
“Unë e di që po komentohet kjo, ka kohë që vit pas viti janë deklaruar edhe nëpër media që Aleanca s’do e kalojë pragun. Ne jemi të konsoliduar, jemi duke punuar. Udhëheqim me pesë komuna e që i kemi kryetarët më të mirë me përformancën më të mirë. Tash, po punojmë për zgjedhje lokale dhe po ju garantoj që nuk e ka asnjë rrezik Aleanca për pragun zgjedhor”, tha Kadrijaj në emisioni “Këndi i Debatit” në Tëvë1.
Duke folur për situatën politike dhe mundësinë e zgjedhjes së kryetarit të Kuvendit, Kadrijaj theksoi se AAK nuk ka ambicie për të përcaktuar kandidatë, por ka ofruar alternativa në rast se Lëvizja Vetëvendosje nuk arrin të sigurojë shumicën e nevojshme.
Kadrijaj përmendi edhe vendimin e Gjykatës Kushtetuese, derisa tha se zgjedhja e kryetarit të Kuvendit kërkon një konsensus të gjerë dhe se përgjegjësia për sigurimin e votave bie mbi LVV-në.
“Ne kemi thënë që po jepim alternativa, nuk ja përcaktojmë në Albin Kurtit, është e drejtë e tija ekskluzive me përcaktua. Por, në momentin që Kurti nuk po i siguron 61 vota, ne po jepim alternativa. Ne e kishim zgjeruar edhe listën, le ta përcakton pra Kurti dhe t’i siguron votat atëherë. Edhe në aktgjykimin e Kushtetueses, kërkohet që të ketë një konsensus për grupin parlamentar, që nëse Kurti nuk e ka mundësinë e aftësinë me i sigurua votat…. atëherë na nuk po ia përcaktojmë emrat, emrat i përcakton VV-ja. Por, përderisa e cakton emrin e ka obligim me i sigurua edhe 61 vota”, tha ajo./teve1.info/
