Skuadra e Napolit ka fituar derbin ndaj Juventusit, të dielën mbrëma, të luajtur në stadiumin “Diego Armando Maradona”.
Dueli i xhiros së 14-të në Serie A, ka përfunduar me rezultatin 2:1 në favor të kampionit në fuqi të Italisë.
Një gol në pjesën e parë dhe një tjetër në të dytën, kanë siguruar fitoren e Napolit.
Të dy golat për Napolin, i shënoi sulmuesi Rasmus Hojlund, i cili zhbllokoi rezultatin në minutën e 7-të kurse fitoren e vulosi në minutën e 78-të, me golin që e shënoi me kokë.
Golin për Juventusin e realizoi Kenan Yildiz në minutën e 59-të, me të cilin barazoi rezultatin në 1:1 por që në fund Napoli shënoi për ta fituar ndeshjen.
Te skuadra e Juventusit, Edon Zhegrova nuk ishte startues por u inkuadrua në minutën e 82-të duke e zëvendësuar mesfushorin Kephren Thuram.
Përkundër angazhimit dhe tentimeve për të bërë diçka më shumë, duket se minutat që i pati në dispozicion nuk ishin të mjaftueshme për Zhegrovën për ta ndihmuar Juventusin që mos ta humb derbin nga Napoli.
Në fakt, në minutën e tretë të kohës shtesë, Zhegrova pati një tentim por gjuajtjen e tij e priti portieri i Napolit.
Në anën tjetër, te Napoli, mbrojtësi Amir Rrahmani ishte i pazëvendësueshëm.
Me këtë fitore, Napoli ka 29 pikë kurse Juventusi mbetet në kuotën e 24 pikëve dhe në pozitën e shtatë në tabelë.
