Nënkryetari i Listës Serbe, Dalibor Jevtiq, thotë se zgjedhjet në katër komuna në veri të Kosovës janë në kundërshtim me demokracinë dhe nuk kontribuojnë në qetësimin e tensioneve dhe ndërtimin e besimit.
“Përkundër kësaj, ju tani keni një përpjekje për një proces zgjedhor në veri të Kosovës dhe Metohisë pa pjesëmarrjen e serbëve dhe një përpjekje për të sjellë në pushtet ata që përbëjnë 2 % të popullsisë në zonat ku 98 % e popullsisë është serbe”, tha Jevtiq për televizionin Prva.
I pyetur nëse pret ndonjë incident apo trazira të dielën gjatë zgjedhjeve, Jevtiq tha se do të bëjnë gjithçka për të ruajtur paqen dhe të mos reagojnë në asnjë mënyrë ndaj provokimeve të mundshme.
“Nëse dikush me të vërtetë dëshironte të shmangte një situatë të tensionuar, do t’i shtynte ato zgjedhje, do të kishte ndërmarrë hapat që do të siguronin paqen në përputhje me kërkesat e Listës Serbe dhe konkluzionet nga Rashka, por këtu është shumë e qartë se mbi të gjitha Albin Kurti nuk dëshiron ta qetësojë situatën”, tha Jevtiq, transmeton teve1.info.
