Amerikani Jericole Hellems, jo vetëm që ia siguroi Vëllaznimit fitoren ndaj Trepçës, por edhe është shpallur më i miri i xhiros në Superligën e Kosovës në basketboll.
Vëllaznimi, të dielën mbrëma në Gjakovë, mposhti Trepçën 85:83 kurse Hellems shënoi me sirenë për triumfin e dytë rresht të ekipit të tij në kampionat.
Gjithashtu, Hellems pati paraqitje të shkëlqyer, duke e përfunduar ndeshjen me 24 pikë, 8 kërcime e 2 asistime, statistika këto që ia siguruan çmimin “MVP i Javës”, ka njoftuar Federata e Basketbollit të Koosvës (FBK), të hënën.
Krahas çmimit individual, Hellems është përfshirë edhe në ekipin më të mirë të javës së nëntë apo “Top 5”.
Hellems nuk është lojtari i vetëm i Vëllaznimit në “Top 5”, pasi ekipi gjakovar përfaqësohet edhe me amerikanin tjetër, Marques Warrick që regjistroi 27 pikë, 2 kërcime e po aq asistime.
Tajh Green i Pejës me 15 pikë e 17 kërcime në fitoren ndaj Golden Eagle Yllit, është pjesë e këtij ekipi, së bashku me Kentrell Pullianin e Rahovecit dhe Shaquan Jules të Borës.
Pullian pati 26 pikë, 5 kërcime e 9 asistime në triumfin e Rahovecit ndaj Bashkimit, ndërsa Jules udhëhoqi Borën me 24 pikë, 5 kërcime e 1 asistim në fitoren kundër Sigal Prishtinës.
