Analisti politik, Shemsi Jashari ka deklaruar se veprimet e fundit të Lëvizjes Vetëvendosje lidhur me propozimin e Glauk Konjufcës si mandatar për kryeministër janë vetëm për të fituar kohë dhe për të shtyrë krizën politike.
Në një intervistë në emisionin “Ditari” në Tëvë1, Jashari u shpreh se nëse kryeministri në detyrë, Albin Kurti do të dëshironte zgjidhje, Konjufca do të ishte propozuar shumë më herët si kandidat për kryetar të Kuvendit.
Sipas tij, LVV është e vetëdijshme se nuk ekziston shumicë parlamentare për të formuar qeverinë e re, pasi partitë opozitare LDK, PDK dhe Nisma, tashmë kanë deklaruar publikisht se nuk do ta mbështesin asnjë marrëveshje të tillë.
Sipas Jasharit, deklaratat e partive të tjera politike tregojnë se mungon shumica e nevojshme për formimin e qeverisë.
“Krejt çka ka bërë me këtë veprim LVV është blerje kohë, shtyrje afati dhe një zgjatje e këtij mundimi të publikut, po të donte Kurti që të bënte zgjidhje Konjufcën do ta propozonte qysh më herët si kryetar për Kuvendin e Kosovës dhe me siguri që do të kalonte sepse kishte deklarime nga partitë politike që janë të gatshëm që ta mbështesin një figurë që është më inifikuese, krejt çka ka bërë me këtë veprim LVV është blerje kohë, nuk do të ketë qeveri Konjufca edhe LVV e dinë këtë. Unë pres që Osmani ta jap dekretin ta nominojë Konjufcën si mandatar, për faktin që është në një vijë me Kurtin, ajo është e bindur se është kërkesë e Kurtit dhe do ta bëjë, po fakti që sot LDK, PDK Nisma me deklarata publike se nuk janë pjesë e asnjë marrëveshje dhe nuk do të mbështetësin mandatarin e ri tregon që nuk ka shumicë dhe nuk ka vota”, ka deklaruar Jashari./teve1.info/
