Takimet e shpeshta të emisarit të BE-së, Miroslav Lajçak me kryeministrin e Kosovës Albin Kurti dhe presidentin e Serbisë, Aleksandar Vuçiq tregojnë seriozitet që Bashkësia Ndërkombëtare e ka vendosur në agjendën e vetë për ta quar përpara procesin e dialogut. Kështu vlerëson analisti, Shemsi Jashari.
Sa i përket pranimit të propozimit të BE-së për planin franko-gjerman, Jashari potencoi se ka një ndryshim në qëndrimet e Kurtit, e cila siç thotë ai, “veçse është e konfirmuar sot me deklarimin e Kurtit”.
Sipas tij, ajo që është parë gjatë këtyre ditëve është një ndryshim kursi të kryeministrit Kurti.
“Pas takimit pamë edhe deklarimin e Kurtit ku e shpreh qëndrimin e vet se e pranon në parim planin e njohur si plani franko-gjerman. Ajo që kemi parë në këto ditë është një insistim i bashkësisë ndërkombëtare dhe rrjedhimisht edhe një ndryshim kursi të Kurtit në raport me këtë temë. Dhe duket që ky insistim i bashkësisë ndërkombëtare po jep rezultatet e para prej një kundërshtimi të ashpër që jo nuk do të ketë Asociacion, do të rishikohen ato marrëveshje që janë kundërshtuar bukur gjatë dhe që e përbëjnë një rrugëtim politik të Kurtit deri në qeverisje. Tashmë kemi një ndryshim kursi. Se si do të jetë ajo marrëveshje që do të firmoset mbetet të shihet”, deklaroi ai në “Info Nata” në Tëvë 1.
Pas takimit me emisarin Lajçak, Kurti ka njoftuar dje se Kosova e pranon propozimin e BE-së për normalizimin e marrëdhënieve me Serbinë dhe e konsideron atë një bazë të mirë për diskutime të mëtejshme dhe një platformë solide për të ecur përpara.
Megjithatë ai ka shtuar se për këtë plan do t’i parashtrojë disa pyetje gjatë bisedimeve në Bruksel. /Teve1.info/
