Avokati, Arbër Jashari e konsideron papërgjegjshmëri dhe jo profesionalizëm referimin e Kosovës si “Kosovë-Metohi” nga Gjykata Speciale dhe Prokuroria Speciale.
Sipas tij edhe pse bëhet fjalë për një dokument ose ngjarje që ka ndodhur rreth dy vite më parë kjo nuk e relativizon aspak si çështje.
Ai ka shtuar se përdorimi i këtij termi ka shpërfaqur edhe një tendencë që mund të interpretohet edhe se këto dhoma janë furnizuar ose janë ndikuar nga qarqet të cilat janë kundër shtetit të Kosovës.
“Me sa pash bëhet fjalë për një dokument ose ngjarje që ka ndodhur rreth dy vite më parë por sidoqoftë kjo nuk e relativizon atë çështje aspak. Është diçka e papërgjegjshme dhe jo profesionale nga ana e Prokurorisë Speciale dhe që nuk i lejohet në asnjë mënyrë zyrtarëve të këtij niveli çfarë janë në Prokurorinë Speciale dhe në institucionet e Dhomave të Specializuara. Emri “Kosovë dhe Metohi” përpos që shpërfaq një mungesë të madhe të profesionalizmit dhe papërgjegjshmërisë, shpërfaq edhe një tendencë që mund të interpretohet se këto dhoma janë furnizuar ose janë ndikuar nga qarqet të cilat janë kundër shtetit të Kosovës gjë që tek kosovarët ndikon edhe më shumë në zbehjen edhe më të madhe të besimit në drejtësinë çfarë e ofrojnë atje”, ka thënë ai në emisionin “Ditari” në Tëvë1.
Ndryshe, një ditë më parë në media u raportua se avokati i Popullit i Dhomave të Specializuara të Kosovës ka pranuar një ankesë nga një i intervistuar i Gjykatës Speciale në Hagë se gjatë intervistimit nga dy punonjës të ZPS-së i ishin referuar Kosovës “Kosova dhe Metohi”.
Siç bëhet e ditur në ankesën drejtuar Avokatit të Popullit të ZPS-së, me 11 nëntor të viti 2022, ankuesi u intervistuar nga dy punonjës të ZPS-së dhe në fillim të intervistës njëri prej punonjësve gjatë leximit të një dokumenti, iu referua Republikës së Kosovës me fjalët “Kosovo i Metohija”.
Ankuesi gjithashtu pretendon se përdorimi i termit nuk ishte thjesht rezultat i një gabimi gjuhësor nga ana e përfaqësuesit të ZPS-së, dhe vë në dukje faktin se përfaqësuesi në fjalë po e lexonte nga një dokument kur përdori këtë term./teve1.info/
