Analisti politik, Shemsi Jashari, ka kritikuar presidenten e vendit, Vjosa Osmani, duke thënë se ajo ka dështuar të jetë një figurë unifikuese dhe se, sipas tij, veprimet e saj janë në funksion të interesave të Lëvizjes Vetëvendosje.
Në emisionin “Ditari” në Tëvë1, Jashari u shpreh se Osmani nuk ka arritur ta përfaqësojë unitetin e vendit.
“Vjosa Osmani ka treguar gjatë rrugës që flet edhe punë edhe dërgon mesazhe vetëm në interes të LVV-së. Edhe ajo mund të jetë pjesë e saj. Ajo ka dështuar në mandatin e saj për të qenë një figurë unifikuese për të përfaqësuar unitetin e vendit dhe rrjedhimisht ka marrë anë në qëndrimet e veta. Nuk mund të quhet presidente e vendit, edhe pse është juridikisht, por në fakt nuk i përfaqëson gjithë qytetarët e Kosovës,” tha Jashari.
Ai kritikoi edhe mesazhet që, sipas tij, presidentja ua dërgon qytetarëve, duke theksuar se ato mund të krijojnë perceptime të gabuara.
“Presidentja e vendit, çka po bën dëm është fakti që dërgon mesazh te qytetari laik, që nuk është jurist. Në ndërgjegjen e tij, po tregon që Gjykata Kushtetuese ka mundësi me bë diçka, me i përjashtu serbët prej vendimmarrjes dhe me vendos qysh po kanë qejf shqiptarët. E kjo është gabim, sepse në rend të parë është Gjykata Kushtetuese dhe mandati i deputetit është i barabartë,” theksoi Jashari.
