Njohësi i çështjeve politike, Shemsi Jashari, ka komentuar zhvillimet e fundit politike në vend, duke u ndalur te diskutimet për emrat e propozuar për president nga Lëvizja Vetëvendosje (VV).
Në emisionin “Ditari” në Tëvë1, Jashari ka kritikuar idenë që një subjekt i vetëm politik të ketë kontroll të plotë mbi institucionet shtetërore, duke e cilësuar këtë si të dëmshme për demokracinë.
Sipas tij, Kushtetuta është ndërtuar mbi parimin e ndarjes dhe balancimit të pushteteve, për të garantuar pavarësinë e institucioneve.
“Nëse synimi është që të mbyllet qarku i kontrollit mbi të gjitha institucionet, atëherë kjo bie ndesh me frymën e Kushtetutës. Mekanizmat janë vendosur pikërisht që institucionet të kontrollojnë njëra-tjetrën dhe të ruhet pavarësia e veprimit”, ka thënë Jashari.
Ai ka shtuar se nuk është e shëndetshme që një subjekt politik, pavarësisht se cili është, të mbajë të gjitha pozitat kyçe në shtet.
“Nuk është në rregull që një subjekt i vetëm të ketë të gjitha pozitat, sepse në fund kontrolli përqendrohet te një lider i vetëm dhe kjo nuk është e mirë për qytetarët”, është shprehur ai.
Jashari ka theksuar gjithashtu rolin e opozitës, duke thënë se ajo duhet të veprojë për të parandaluar një situatë të tillë.
“Është jetike për opozitën dhe për qytetarët që ajo të ushtrojë rolin e saj. Opozita ka marrë besimin e një pjese të qytetarëve dhe duhet të përfaqësojë ata që nuk kanë votuar për pushtetin aktual, duke mos lejuar që një subjekt i vetëm të kontrollojë gjithçka”, ka përfunduar Jashari.
