Në këtë formë po i largojnë pajisjet e dëmtuar të një nate më parë.
Kjo ndërhyrje emergjente nga ekipa teknike e ndërmarrjes “Trepça”, vjen menjëherë pas avaris që ndodhi në “ Trafon Tuneli”.
Ku si shkak i kësaj 63 minatorë mbetën të ngujuar në horizontet e minierës së Trepçës për disa orë me radhë.
“Dje, më datën 7 në ora 19:30 ka ndodhur një avari, si pasojë e së cilës është ndërprerë energjia elektrike për dy njësi edhe për flotacion edhe për njësinë e Stantergut në minierë, si pasojë e kësaj mbetur të ngujuar 63 minatorë. Pas kësaj kemi filluar rregullimin e trafos për të bërë një bajpas për të bërë qasje në minierë. Fatmirësisht, nuk kemi pasur pasoja dhe minatorët kanë dalë shëndoshë e mirë. Para se të arrinte rryma, kanë dalë 54 minatorë, ndërsa rreth orës 02:30 kemi bërë kyçjen dhe kanë dalë 9 minatorët e tjerë”, tha Faton Ahmeti u.d kryeshefit ekzekutiv në Trepçë.
Ndërsa për atë se si erdhi deri tek kjo situatë, sipas menaxhmentit të gjigantit metalurgjik “Trepça”, ende nuk janë në dijeni.
“Është avaria e dytë që po na ndodh e ngjashme. Edhe më 14 maj të këtij viti kemi pasur djegie të ngjashme. Pasojat nuk i dimë, ende nuk kemi një raport zyrtar që e specifikon deri ku është pasoja. Kanë marrë pjesë Policia, zjarrfikësit, forenzika, dhe inspektori i KPM-së kanë marrë pjesë dhe presim të na lajmërojnë se cilat janë shkaqe”, u shpreh Ahmeti.
Kurse sipas drejtorit të minierës së Stantërgut, Shyqyri Sadiku, duhet të sanohet problem i tërë për të filluar punën edhe flotacioni.
“Miniera është normalizuar është kthyer prodhimi, është kyç sistemi i pompitimit e ventilator, kushtet janë krijuar për punë . Besojmë që shumë shpejt me mbështetjen e institucioneve të Republikës së Kosovës me KEK,KOSST do të kthejmë normalitetin edhe në flotacion dhe të fillojë prodhimi”, tha ai.
E më një situatë të tillë, sipas kryetarit të Sindikatës së Minatorëve, Ibrahim Januzi, minatorët janë përballur edhe disa herë të tjera brenda këtij viti.
“Kushtet janë jashtëzakonisht të mjerueshme dhe me rrezik të plotë, për shkak të pajisjeve të stërvjetruara dhe mungesës së investimeve në pajisje përcjellëse, që ndikojnë direkt në sigurinë dhe jetën e njerëzve. Kjo nuk është hera e parë që po na ndodh mbyllja jonë. Diku vetëm këtë vit janë dy ose më shumë mbyllje që kanë ndodhur gjatë vitit, po përsëriten të njëjtat gjëra. Nuk duhet pritur që të ndodhë ndonjë tragjedi, pastaj të intervenohet”, u shpreh ai.
I njëjti ka folur edhe për vështirësitë me të cilat u përballen minatorët gjatë daljes nga thellësia e minierës.
“Gjendja shëndetësore është normale, edhe pse ata nuk e shprehin mirë. Por dalja prej thellësisë 800 metra nën tokë, nëpër shkallë emergjente që janë në formë vertikale, thuajse vetëm ata që e kanë provuar e dinë sfidën dhe vështirësitë që janë. Ajo ndikon në shtangim të muskujve, ndikon në lodhje. Thuajse një pjesë e tyre, në momentin që dilnin, edhe ekipi mjekësor e shikonte gjendjen e tyre. Thuajse të gjithë e kishin tensionin jashtëzakonisht shumë të lartë”, tha Januzi.
Ndryshe kujtojmë se minatorët ishin pjesë e ndërrimit të dytë, i cili përfundonte në orën 23:00.
