James Harden është pranë transferimit te Cleveland Cavaliers nga Los Angeles Clippers, në një marrëveshje shkëmbimi që pritet të përfshijë lëvizjen e Darius Garland në drejtim të kundërt. Edhe pse marrëveshja ende nuk është konfirmuar zyrtarisht nga NBA, burime të afërta me negociatat bëjnë të ditur se gjithçka është drejt finalizimit, në pritje të testeve mjekësore.
Harden, 36 vjeç, është një nga basketbollistët më të mëdhenj të brezit të tij. 11 herë pjesëmarrës i All-Star dhe fitues i çmimit MVP në vitin 2018 me Houston Rockets, ai mbetet ende pa një titull kampioni në NBA – një fakt që ka ndikuar drejtpërdrejt në vendimin e tij për t’u transferuar.
“I shoh Cavaliers si një mundësi reale për të fituar në Lindje. Kanë një skuadër shumë të mirë, staf trajnerësh cilësor dhe gjithçka që duhet për të garuar seriozisht,” deklaroi Harden për ESPN. “Doja të qëndroja në Los Angeles, por nuk kam fituar kurrë një titull. Duke e parë me mendje basketbolli, mendoj se këtu kemi më shumë shanse.”
Cleveland aktualisht renditet në vendin e pestë në Konferencën Lindore, në luftë për një pozicion të favorshëm në play-off, ndërsa Clippers janë të nëntët në Perëndim. Harden ka luajtur rol kyç në ringritjen e Clippers këtë sezon, pas një fillimi shumë të dobët me bilanc 6 fitore dhe 21 humbje, por mungoi në ndeshjen e fundit kundër Philadelphia 76ers, ndërsa negociatat ishin në zhvillim.
Gjatë karrierës së tij në pesë skuadra të ndryshme, Harden ka realizuar 28,805 pikë, duke u renditur i nënti në listën e shënuesve më të mirë në historinë e NBA-së.
Cavaliers nuk kanë fituar një titull kampioni që nga viti 2016, dhe ardhja e Harden shihet si një hap i madh drejt ringritjes së ambicieve për majën e NBA-së.
