Shefi i kabinetit të ministres së Punëve të Jashtme dhe Diasporës, Sharr Jakupi ka reaguar pas raportimeve se është fotografuar në një klub striptizi jashtë vendit.
Jakupi ka thënë se këto raportime janë “lajme të rreme që po përhapen nga këlyshët e klanit Pronto”.
Përderisa ka shtuar se janë të pavërteta aludimet se ai ka mundur të shkojë në këtë klub gjatë vizitës zyrtare në Tajlandë, si dhe ato mbi llojin e klubit.
“Dua të theksoj që aludimet e mediave duke filluar nga lloji i club-it e deri tek pjesa që ka mundur të jetë vizitë zyrtare, janë të pavërteta dhe me tendencë të prishin reputacionin tim si individ, profesionist dhe zyrtar shtetëror”, ka shkruar Jakupi.
Mediat publikuan një fotografi ku pretendohej se shihej Jakupi në një klub striptizi në Tajlandë.
Duke u përgjigjur nëse kjo mund të ketë ndodhur përgjatë ndonjë vizite zyrtare në këtë vend, nga MPJD thanë se në dy vitet e fundit nuk ka pasur vizita zyrtare në Tajlandë.
