Kandidati për kryetar të Komunës së Prishtinës, Uran Ismaili, ka njoftuar se të mërkurën, më 23 korrik, me fillim nga ora 19:30, do të prezantojë vizionin dhe zgjidhjet konkrete për kryeqytetin, në një ngjarje publike që do të mbahet në Sheshin “Adem Jashari”.
Në këtë tubim të hapur për qytetarët e Prishtinës, Ismaili do të paraqesë programin e tij qeverisës, i cili synon ta transformojë Prishtinën në një qytet më funksional, të pastër, më të gjelbër dhe më të lehtë për të jetuar. Programi i tij pritet të përfshijë zgjidhje konkrete për sfidat me të cilat përballen përditë banorët e kryeqytetit.
Përmes një ftese publike në rrjete sociale, Ismaili ka ftuar qytetarët që të marrin pjesë në këtë ngjarje, duke e cilësuar si një mundësi për t’u informuar nga afër me vizionin e tij për një Prishtinë që, siç thotë ai, “i shërben të gjithëve”.
“Merre shokun, shoqen, familjen, e hajdeni bashkë! Ejani të dëgjoni vizionin tonë për një Prishtinë që i shërben të gjithëve,” thuhet në ftesë.
Ngjarja shënon një moment të rëndësishëm në fushatën e Uran Ismailit, për të komunikuar drejtpërdrejt me qytetarët dhe për të prezantuar ofertën e tij politike për zgjedhjet lokale.
