Njohësi i çështjeve të sigurisë, Avni Islami, ka deklaruar se veprimtaria e vazhdueshme e Veljko Odaloviq në krye të Komisionit të Qeverisë së Serbisë për Persona të Zhdukur përbën, sipas tij, një provokim të hapur dhe fyerje ndaj viktimave të luftës në Kosovë.
Në një reagim të publikuar në rrjetin social Facebook, Islami ka thënë se që nga viti 2006 prania e Odaloviq në këtë pozitë ka shkaktuar tensione dhe ka ndikuar në vështirësimin e dialogut në Bruksel, si rezultat i kundërshtimeve të palës kosovare.
“Deri në vitin 1999, Odaloviq ishte zyrtar i lartë i regjimit kriminal të Sllobodan Millosheviqit, duke mbajtur pozicionin kyç të Kryetarit të Qarkut të Kosovës me qendër në Prishtinë. Pas tërheqjes së forcave serbe, ai vazhdoi karrierën e tij politike në Beograd. Që nga viti 2006, prania e tij në krye të çështjes së personave të zhdukur ka shkaktuar tensione të vazhdueshme dhe bllokim të qëllimshëm të dialogut në Bruksel, për shkak të kundërshtimeve të ashpra dhe legjitime nga pala e Kosovës”, ka shkruar Islami.
Sipas tij, Odaloviq sot vazhdon të udhëheqë një qasje që përfshin mohimin e krimeve të luftës dhe interpretimin e rasteve të ndryshme si presion ndaj komunitetit serb në Kosovë.
Ai ka përmendur edhe deklaratat e fundit të Odaloviq lidhur me arrestimin e pesë të dyshuarve në rastin e njohur si “Reçaku dy”.
“Sot, Odaloviq vazhdon të udhëheqë një fushatë agresive që bazohet në dy drejtime të rrezikshme: Arsyetimi i krimeve të luftës: Ai përpiqet të mohojë publikisht masakrat ndaj civilëve shqiptarë. Së fundmi, duke komentuar arrestimin e pesë të dyshuarve në rastin e njohur si “Reçaku dy”, ai e quajti zbatimin e ligjit si “presion ndaj serbëve” dhe kërcënoi se ky është “një mesazh për të dëbuarit”. Ai synon të manipulojë faktorin ndërkombëtar, duke i paraqitur serbët lokalë si të rrezikuar nga shqiptarët, me qëllim që të fshehë përgjegjësinë shtetërore të Serbisë dhe të pengojë integrimin e tyre”, ka shtuar ai.
Në fund të reagimit, Islami ka theksuar se institucionet e Kosovës mbeten të përkushtuara për zbardhjen e fatit të personave të zhdukur dhe për drejtësi për viktimat e luftës.
“Institucionet e Kosovës mbeten të vendosura në kërkesën për drejtësi dhe zbardhjen e fatit të të gjithë të zhdukurve, duke refuzuar që kjo dosje humanitare të mbahet peng e figurave që i shërbyen regjimit të Millosheviqit”, ka përfunduar ai./teve1.info/
