Njollat e gjakut në karriget e kësaj kafiterie mbetën deri pasditen e së hënës.
Edhe plumbat në derën e saj po ashtu.
Këto janë dëshmi e një vrasjeje të rëndë që ndodhi mëngjesin e hershëm në Çarshinë e vjetër në Gjakovë.
Pronari i lokalit vrau klientin e tij, ndërsa një person tjetër mbeti i plagosur.
Në kushte anonimiteti, disa prej banorëve të Çarshisë së Vjetër të Gjakovës, i thanë televizionit se dorasi, Nexhdet Zymberaj, dhe viktima Rasim Binakaj e njihnin njëri tjetrin.
Zëdhënësi i Policisë për Rajonin e Gjakovës, Sheremet Elezaj, tregon se ende janë në kërkim të të dyshuarit.
Derisa shton se trupi i 38-vjeçarit është dërguar për obduksion.
Ndërkaq, i plagosuri në këtë rast është jashtë rrezikut për jetë dhe po vazhdon trajtimin në Spitalin Rajonal të Gjakovës.
Gjatë ditës, Prokuroria Themelore e Gjakovës përmes një komunikate për media, njoftoi se rasti është inicuar si “vrasje e rëndë”.
