Irani nisi të dielën sulme me dronë dhe raketa duke synuar Bahreinin dhe Kuvajtin në përgjigje të sulmeve ajrore amerikane që goditën Republikën Islamike dhe kërcënoi se negociatat për t’i dhënë fund luftës mund të “ndërpriten plotësisht” nëse Uashingtoni vazhdon sulmet e tij.
Ushtria kuvajtiane tha se mbrojtja ajrore ka kapur dronë dhe raketa iraniane që po vinin të dielën në mëngjes, menjëherë pas sulmeve amerikane.
Kuvajti, i cili strehon një bazë të madhe ushtarake amerikane, tha se kishte zbuluar dhe kapur dy raketa balistike dhe nuk kishte raportime për të lënduar ose dëme, raporton AP.
Ministria e Brendshme e Bahreinit tha se sulmet iraniane dëmtuan një ndërtesë banimi pranë aeroportit ndërkombëtar dhe nuk pati viktima. Ministria publikoi foto të një ndërtese 8-katëshe, me katin e sipërm të shkatërruar plotësisht, të mbushur me rrënoja dhe dritaret e saj të thyera.
Përpjekjet për të rihapur Ngushticën e Hormuzit pa mbikëqyrjen e drejtpërdrejtë të Iranit shkaktuan përplasje në rajon dhe rrezikuan negociatat për një armëpushim të qëndrueshëm.
Një organ detar shumëkombësh i mbikëqyrur nga Marina Amerikane tha të shtunën se do të zgjeronte një rrugë pranë Omanit për të lejuar trafikun si hyrës ashtu edhe dalës, duke krijuar një pikë të re konflikti me Teheranin.
Irani këmbëngul se vetëm ai duhet të qeverisë ngushticën, grykën e ngushtë të Gjirit Persik që dikur transportonte një të pestën e naftës dhe gazit natyror në botë.
Ministri i Jashtëm iranian, Abbas Araghchi, e përsëriti këtë pretendim gjatë një vizite shtetërore në Irak të dielën.
“Çdo ndërhyrje në këtë çështje, çdo përpjekje për të vendosur marrëveshje të reja ose të ndara nga ato që po kryhen aktualisht nga Republika Islamike e Iranit, vetëm sa do të çojë në ndërlikime të mëtejshme, do të vonojë rihapjen e Ngushticës së Hormuzit dhe do të rrisë nivelin e tensionit, ashtu siç gjatë dy netëve të fundit pamë incidente në Ngushticën e Hormuzit që çuan në një rritje të tensionit dhe konfrontimit”, tha ai në Bagdad.
Shtetet e Bashkuara dhe Irani ende po debatojnë kushtet e një marrëveshjeje të përkohshme paqeje, duke përfshirë çështje të tilla si kalimi i anijeve nëpër grykën e ngushtë të Gjirit Persik, heqja e bllokadave dhe sanksioneve amerikane dhe adresimi i së ardhmes së rezervave të uraniumit të pasuruar në nivel të lartë të Iranit.
Sipas memorandumit të mirëkuptimit të nënshkruar më parë këtë muaj , SHBA-të dhe Irani kanë 60 ditë për të sqaruar detajet. Sulmet kërcënojnë ta rrëzojnë marrëveshjen përpara se ajo të finalizohet.
