Policia e Kosovës ka arritur të gjejë një person nga Gjilani, i cili ishte raportuar si i zhdukur disa orë më parë, pasi vetura e tij ishte zbuluar e braktisur në një zonë malore të kësaj komune.
Sipas zëdhënësit rajonal të Policisë së Kosovës, Ismet Hashani, pas lokalizimit, personi është dërguar në stacionin policor të Gjilanit, ku është marrë në pyetje lidhur me arsyet që çuan në braktisjen e automjetit.
Ai ka bërë të ditur se hetimet për rastin janë në vazhdim dhe do të zhvillohen në bashkëpunim me Prokurorinë e Shtetit.
Më herët gjatë ditës, njësitë policore së bashku me ekipet e kërkim-shpëtimit kishin nisur një operacion për gjetjen e personit të zhdukur, pas raportimit për veturën e lënë në mal.
Autoritetet kanë konfirmuar se nga ky rast nuk ka persona të lënduar.
“Në orët e pasdites së sotme është lokalizuar nga Policia e Kosovës personi në kërkim, pronari i veturës së braktisur në një mal në rrethinat e komunës së Gjilanit. I njëjti është intervistuar nga hetues policorë në Gjilan, për arsyen pse është braktisur vetura. Rrethanat rreth rastit do të hetohen nga ana e Prokurorit të Shtetit dhe Policisë së Kosovës”, ka thënë për teve1.info, Hashani. /teve1.info/
