Sulmuesi Marcus Thuram mund të largohet nga skuadra e Interit pas vetëm një sezoni në Itali.
Mediumet italiane kanë raportuar të mërkurën se Interi tashmë i ka caktuar çmimin Thuramit, për të cilin ka shfaqur interesim skuadra e Paris Saint-Germainit.
Mësohet se Parisi tashmë ka kontaktuar Interin pasi po e sheh Thuramin si zëvendësim ideal për Kylian Mbappen, i cili do të largohet këtë verë si lojtar i lirë.
Duke e parë interesimin e fortë të Parisit për Thuramin, skuadra e Interit tashmë i ka caktuar çmimin sulmuesit 26-vjeçar, të cilin e transferoi verën e shkuar si lojtar të lirë.
Thuhet se Interi i ka bërë me dije Parisit se duhet të paguajë 80 milionë euro për kartonin e Thuramit, i cili ka kontratë me ekipin italian deri në verën e vitit 2028.
Thuram po shkëlqen në sezonin e tij të parë tek Interi, pasi në 40 paraqitje në të gjitha garat, ai ka shënuar 12 gola dhe ka bërë po aq asistime.
