Inteligjenca artificiale sjell përfitime në jetën e përditshme të njerëzve, duke ndikuar pothuajse në çdo aspekt të saj – nga hulumtimi dhe arsimi, deri te qasja i informatave në kohë reale, por ajo po përcillet edhe me rreziqe sidomos në aspektin e përhapjes së lajmeve të rreme dhe propagandës.
Ky fenomen është veçanërisht i ndjeshëm për shkak të tentativave të vazhdueshme për luftë hibride, që sipas ekspertëve vërehen edhe nga Serbia.
Eksperti i kibernetikës Halil Berisha ka thënë për KosovaPress se një rrezik potencial është mashtrimi i thellë Deep Fake, ku merren informatat vizuale të personave të ndryshëm, të cilët manipulohen nga aspekti vizual dhe audio duke krijuar një personazh të dytë me pamje pothuajse një qind për qind të njëjtë.
“Inteligjenca artificiale krijon një mundësi shumë të madhe, e cila po shfrytëzohet për shpërndarjen e lajme të rreme. Një prej më të rrezikshmeve dhe që është ende në zhvillim e sipër, është e ashtuquajtura Deep Fake. Merren informatat vizuale të ‘iks’ personit, trajnohet inteligjenca artificiale dhe ajo është në gjendje që nga ato informata që posedon, sikurse informatat vizuale dhe informatat audio të atij personi, që të krijojë një personazh të dytë, të themi ashtu, të këtij personi dhe që të ketë pamjen thuajse një qind për qind të njëjtë”, ka thënë Berisha.
Berisha ka vënë në dukje se një tjetër metodë që po përdoret për krijimin e lajmeve të rreme është aftësia e inteligjencës artificiale për të komunikuar në gjuhë dhe aksente të ndryshme, e cila po përdoret në luftën hibride përmes shteteve, me të cilën ka pasur tentativa edhe nga Serbia.
“Një metodë tjetër që po përdoret për krijimin e lajmeve të rreme përmes inteligjencës artificiale është aftësia inteligjencë artificiale për të shënuar në gjuhë të ndryshme, por jo veç në gjuhë të ndryshme edhe në aksentët e ndryshme. Kështu që tashmë kjo po përdoret shumë në luftën hibride përmes shteteve. Pra, ne jemi dëshmitarë edhe të shumë tentativave edhe nga Serbia që të përmes Inteligjencës artificiale që të dezinformojë dhe të rrisë propagandën e saj, që është një pjesë shumë e rëndësishme e luftës hibride ndaj Kosovës”, ka shtuar ai.
Megjithatë, sipas Berishës, inteligjenca artificiale nuk është vetëm burim rreziku, por ajo mund të shërbejë edhe si mjet për luftimin e dezinformatave, duke përmendur përdorimin e Grokut në platformën X, i cili mundëson verifikimin e lajmeve.
“Por, përveç kësaj që na jep inteligjenca artificiale, këtë mundësinë ose rrezikun për lajme të rreme, kjo i jep edhe anën tjetër, jep domethënë edhe një mundësi të jashtëzakonshme për luftimin e lajmeve të rreme. Për shembull, në platformën X në Twitter është përdorimi i Grokut, i cili të mundëson që të verifikosh secilin lëndë në kohë reale edhe të verifikosh komentet atë se çka thonë personat. Në këto raste kur robotët tentojnë të shtynë përpara narrativit serb, kjo mundet të luftohet shumë lehtë”, ka thënë Berisha.
Berisha e sheh si të rëndësishme që qytetarët të detektojnë lajmet e rreme, duke i këshilluar ata që të përcjellin lajmet vetëm nga mediat, të cilat janë të njohura dhe mos të ndikohen nga shpërndarja dhe shikimet që ato kanë, pasi që nuk do të thotë që është i vërtetë.
