Kryeministri i Kosovës, Albin Kurti ka thënë se sistemi i hallkave për mbikëqyre elektronike do të ndihmojë në zvogëlimin e rasteve të dhunës në familje.
Pas lanësimit të këtij projekti që u bë të martën në drejtorinë e përgjithshme të Policisë së Kosovës, Kurti tha se problemet më të mëdha janë për shkak të mo respektimit të urdhrit mbrojtës.
“Problemet më të mëdha i kemi për shkak se nuk respektohen urdhrat mbrojtës. Defekti nuk është mungesa e hallkave për monitorim elektronik, por mos respektimi i urdhrave mbrojtëse. Kjo do ta reduktoj jashtëzakonisht shumë dhunën në familje”, tha Kurti në deklarimin për media pas prezantimit të projektit.
Ministrja e Drejtësisë, Albulena Haxhiu tha se ky është një ndër projektet e shumta që kanë marrë dhe më i rëndësishmi për mbrojtjen e jetës së grave dhe vajzave.
“Kjo është një ndër projektet më të rëndësishme për të mbrojtur jetën dhe dinjitetin e vajzave dhe grave në Kosovë. Dhuna në familje nuk është çështje private është përgjegjësi e institucioneve dhe në këtë rast presim veprime serioze sidomos nga Prokuroria dhe Gjykata. Dënimet e ulëta dhe veprimet me lëshim në procedurë të rregull nga Prokuroria i inkurajon dhunuesit në mënyrë që shteti pra me këto veprime, institucionet e drejtësisë, dhunuesit po i shndërrojnë në vrasës”, tha Haxhiu.
Kurse ministri i Mbrotjes, Xhelal Sveçla tha se lanësimi i këtij projekti është një sukses i Policisë së Kosovës për parandalimin e dhunës ndaj vajzave dhe grave. Ai tha se ky sistem do të përdoret edhe raste të tjera të veprave penale.
“Ky është edhe një sukses i Policisë së Kosovës drejt asaj që të parandalohet dhuna ndaj vajzave dhe grave dhe jo vetëm. Do të përdoret edhe për vepra penale, por primare është parandalimi i dhunës ndaj vajzave dhe grave. Ky projekt do të ndihmojë në parandalimin e rasteve të dhunës”, tha ai.
Ndërsa, drejtori i policisë, Gazmend Hoxha ka uruar të ketë sa më pak të rasteve të dhunës në familje.
“Urojmë që të ketë sa më pak raste të dhunës në familje, sidoqoftë sot e kemi një mjet më shumë në parandalimin e rasteve të dhunës në familje por edhe rasteve tjera, urojmë që kemi një bashkëpunim sa më të mirë me qytetarët edhe të kemi sa më pak të rasteve të dhunës në familje”, ka thënë Hoxha.
Qeveria ka ndarë 600 mijë euro për blerjen e byzylykëve elektronik./teve1.info/
