Ndonëse ishin të pakta, edhe zgjedhjet e jashtëzakonshme parlamentare u zhvilluan nën hijen e disa incidenteve.
Policia e Kosovës ka njoftuar se ka iniciuar raste dhe hetime lidhur me disa vepra penale, përfshirë: “Falsifikim të rezultateve të votimit”, “Asgjësim të dokumenteve të votimit”, “Cenim të fshehtësisë së votimit”, “Pengim të procesit të votimit”, si dhe “Cenim të përcaktimit të lirë të votuesve”, në disa komuna të Republikës së Kosovës.
Duke filluar nga rajoni i Prishtinës, konkretisht në Drenas, është raportuar se një person dyshohet të ketë kryer veprën penale “Cenim i fshehtësisë së votimit”.
Po ashtu në rajonin e Gjilanit, Policia e Kosovës ka iniciuar një rast për veprën penale” Cenim i fshehtësisë së votimit”, dhe “Pengim i procesit të votimit”, pasi një dyshohet se e ka ekspozuar fletën e votimit para vendosjes së saj në kutinë e votimit.
E në Komunë e Ranillugut, është arrestuar një grua nën dyshimin se ka ushtruar ndikim te votuesit e subjekteve të tjera.
Ndërkohë, incidente janë shënuar edhe në në qytetin e Shtimes, ku një mashkull ka grisur fletëvotimin e tij dhe të një gruaje.
Një rast i tillë kishte ndodhur edhe në qytetin e Prizrenit, këtu një person grisi fletëvotimin.
“Ka qenë një incident ku një person i moshuar në shenjë revolte ka shqyer një votim. Policia e ka shoqëruar në stacion dhe në konsultim me prokurorin i ka marr masat e nevojshme”, tha Shaqir Bytyqi, zëdhënës i Policisë për rajonin e Prizrenit.
Edhe në këto zgjedhje është identifikuar fotografimi i votës, ku një qytetar suherakas ka fotografuar votën e tij e më pas, po të njëjtën e ka publikuar në rrjetet e tij sociale.
Kurse, edhe në rrafshin e Dukagjinit në Pejë, është raportuar se në një nga qendrat votimit një fletëvotim kishte pasur vulën ndryshe nga fletëvotimet tjera të KQZ-së.
Por, dita e zgjedhjeve të 28 dhjetorit nuk mbaroi me kaq.
Edhe në këto zgjedhje pati raste kur qytetarët nuk e gjetën emrin në listat e qyteteve ku jetojnë.
“Jam votues i rregullt, por kësaj radhe më është bërë shumë e padrejtë më kanë ndërruar vendvotimin. Nuk e di qëllimi ku është, por jam shumë i hidhëruar”, u shpreh qytetari Mensur Gashi.
Kurse, një problem të natyrës tjetër është hasur në fshatin Turiqevc të Skenderajt, ku për tri orë mungoi energjia elektrike.
“Gjatë paradites kemi pasur problem me energjinë elektrike që na është paraqitur si shqetësim. Kishim nevojë për ngrohje se ambienti sidomos për komisionarët ishte i papërshtatshëm pa ngrohje dhe është dashur që të gjejmë mënyra alternative me gjeneratorë”, bëri të ditur Fadil Beqa – menaxher i qendrës.
Probleme me energjinë elektrike në ditën e zgjedhjeve u hasën edhe në disa qytete tjera të Kosovës.
