Profesori i shkencave politike Dorajet Imeri, tha se efekti i fraksionit serb në Malin e Zi do të jetë shumë më i gjerë se në raport me Kosovën.
Madje sipas tij, nëse forcohet kaq shumë elementet pro serbe në Mal të Zi, mundësia për destabilizim të rajonit është i madh.
“Fraksioni serb në Malin e Zi është sikur më herët kaq i fuqishëm dhe kjo natyrisht që do të ketë efekte në poltikën e jashtme të Malit të Zi, por frika është që ky efekt do të jetë shumë më i gjerë se në raport me Kosovën. Pra unë uroj që kjo të mos dalë kështu, por kam një bindje që nëse forcohen kaq shumë elementet pro serbe në Mal të Zi, mundësia e destabilizmit të rajonit janë relativisht të mëdhaja, sepse në fakt është edhe një shtet i tretë. Pra këtu përfshihet Serbia, Bosnje e Hercegovina e tashmë edhe Mali i Zi që ka politikë pro serbe përbrenda strukturave të tyre dhe kjo kam dronë që mund të ketë efekte të caktuara”, tha ai në emisionin “Ditari” në Teve1.
Ndryshe sot është zhvilluar një takim mes kryeministrit të vendit, Albin Kurti dhe kryeministrit në detyrë të Malit të Zi, Dritan Abazoviq.
Pas nënshkrimit të marrëveshjes bilaterale mes Kosovës dhe Malit të Zi, për korridorin e qiellit të hapur, kryeministri i Malit të Zi, Dritan Abazoviq, tha se në këtë mënyrë do u japin shembull shteteve tjera se si duhet të jenë marrëdhëniet mes dy qeverive.
Kurse presidenti i ri i Malit të Zi, Jakov Millatoviq ka thënë se nuk është realiste të pritet një vendim i Malit të Zi për ta tërhequr njohjen e pavarësisë së Kosovës.
“Nuk është realiste të tërhiqet njohja e Kosovës dhe kjo është një çështje shumë e qartë”, ka thënë Milatoviq./teve1.info./
