Profesori i shkencave politike, Dorajet Imeri, ka deklaruar se në rast të njohjes së Kosovës nga 5 shtetet mosnjohëse të Bashkimit Evropian do të devalvohej rëndësia e njohjes nga Serbia.
“Duhet ta shohim pak me më optimizëm situatën. Situata momentale gjeopolitike dhe këto rreshtimet dhe rirreshtimet potenciale kanë bërë që njohja e pavarësisë së Kosovës të jetë pjesë e kalkulimit. Në anën tjetër çka mund të duket si pozitive është procesi vijues, sidomos sa i takon njohjeve. Konsideroj që nëse eventualisht BE-ja ka punuar me palët, çka e di që ka pasë disa takime por nuk e di sa kanë qenë të suksesshme që 5 vendet e BE-së të njohin Kosovën si produkt i vullnetit të mirë të deklaruar me këtë marrëveshje që është edhe vullnet i shteteve të BE-së, konsideroj që devalvohet rëndësia e njohjes së Serbisë”, ka thënë Imeri.
Sipas tij Kosova nuk duhet të ketë pritshmëri për njohje de jure nga Serbia me këtë klasë politike atje.
“Pritshmëria me pas njohje de jure nga Serbia, me këtë konstelacion, me këtë klasë politike, nuk ka presion ndërkombëtar që mund ta detyrojë Serbinë ta njohë pavarësinë e Kosovës me këtë garniturë politike që e ka tash. Serbia është bombarduar, e ka pranuar edhe sulmin ushtarak. Ka pasur qëndrim të qartë në këtë aspekt”, ka shtuar ai për Këndin e Debatit në Tëvë 1.
