Politologu, Dorajet Imeri e sheh tw pamundur një koalicion mes Lëvizjes Vetëvendosje dhe Partisë Demokratike të Kosovës.
Megjithatë, sipas Imerit, vetëm një koalicion i tillë do të prodhonte një rezultat të qëndrueshëm në këto kushte.
Ai ka shtuar se eventualisht mund të ketë një koalicion minimal me 60 deri 62 deputetë dhe një qeveri që e din se do të ketë një mandat së paku 10 muaj.
“Në këto kushte e vetmja mundësi që e prodhon një rezultat të qëndrueshëm është koalicioni në mes të LVV-së dhe PDK-së , por kjo me gjasë është e pamundshme të ndodhë dhe nuk do të ndodhë si e tillë. Çka eventualisht mund të ketë është një koalicion minimal me 60 deri 62 deputetë dhe një qeveri që e din se do të ketë një mandat së paku 10 muaj dhe maksimalisht një mandat të plotë varësisht sesa do të mund të prodhohet një konsensus rrugës për zgjedhjen e presidentit apo presidentes të ardhshme të Republikës”, ka thënë ai në emisionin “Ditari” në Tëvë1.
Tutje, ai ka thënë se NISMA mund të jetë përcaktues për formimin e qeverisë së re.
“Gjëja më e mundshme që mund të ndodhë sepse është e deklaruar është që Nisma Socialdemokrate të jetë përcaktues për formimin e qeverisë së re dhe kjo është fare lehtë e arritshme”, ka shtuar Imeri./teve1.info/
