Në ndeshjen e tij të fundit, u përshëndet me gol dhe fitore.
Iljasa Zulfiji, njëri nga futbollistët më të mirë të Dukagjinit në dy vitet e fundit, të enjten e e ka zhvilluar ndeshjen e fundit për skuadrën nga Klina.
Ai kontribuoi me gol në fitoren e sotme të Dukagjinit ndaj Lirisë (2:1).
Për të ishte kjo ndeshja e fundit me fanellën e klinasve.
Sulmuesi nga Lugina e Preshevës do ta vazhdojë karrierën në Kazakistan.
Zulfiji do të udhëtojë të premten ku pritet të zyrtarizohet së shpejti te Zhenis Astana, klub që bën gara në Premierligën e atjeshme.
Sulmuesi i krahut të djathtë me klubin nga Astana do të nënshkruajë kontratë 1-vjeçare, ndërsa kalimin e ka konfirmuar edhe për Tëvë 1.
25-vjeçari ishte pjesë e Dukagjinit nga vera e vitit 2022 dhe ishte ndër më të dalluarit në ekipin e drejtuar nga Armend Dallku.
Ai këtë sezon ka shënuar katër gola në Superligën e Kosovës.
Zulfiji numëron katër gola edhe në katër paraqitje me Dukagjinin në kualifikimet e Ligës së Konferencës.
Te Zhenis Astana luan edhe sulmuesi tjetër shqiptar, Arb Manaj, si i huazuar nga Drita.
