Ilir Kulla, ekspert i çështjeve të sigurisë, në emisionin “Matrix” në Tëvë1 ka komentuar takimet e fundit mes presidentit amerikan Donald Trump, presidentit rus Vladimir Putin dhe presidentit ukrainas, lidhur me armëpushimin në Ukrainë.
Sipas Kullës në takimi Trump-Putin, vetëm një pjesë e vogël e diskutimeve ka qenë e lidhur me Ukrainën.
“Vetëm 5 përqind e marrëveshjes ka të bëjë me Ukrainën. Pra, presidenti Trump ka thënë se i indeksion çështjet e mëdha me Kinën. Në momentin që janë takuar në Alaskë, në ngushticën e Beringut kanë kaluar 11 luftanije kineze,” tha Kulla.
Ai shtoi se takimi me Putinin ka pasur një fokus më të madh sesa vetëm lufta në Ukrainë.
“Nëse e shikojmë takimin e mbajtur me Putinin, me gjuhën e trupit dhe të gjitha elementet e tjera, shohim se vetëm 5% ka të bëjë me diskutimet për luftën me Ukrainën. Në asnjë pjesë të marrëveshjes dy palët nuk diskutojnë Kinën, por shqetësimi i trupit është takimi i Putinit me Kinën në shtator, për këtë ai e takoi atë,” tha Kulla.
Ai përfundoi duke theksuar se armëpushimi në Ukrainë shihet si një mundësi e vogël për paqe, por nuk është fokusi kryesor i marrëveshjes.
“Në këtë pikë nuk ka të bëjë fare lufta në Ukrainë. Trump po i jep një shans Ukrainës për shkak të marrëveshjes së madhe, por çështja kryesore nënkupton Kinën. Kjo është vetëm si një mundësi që i jepet paqes,” tha Kulla.
