Instituti Kombëtar i Shëndetësisë Publike të Kosovës (IKSHPK) ka njoftuar se uji në pishinën publike të Gërmisë nuk i ka plotësuar standardet mikrobiologjike, sipas analizave laboratorike të realizuara më 22 korrik 2025.
Sipas njoftimit të IKSHPK-së, mostra e ujit ishte marrë më 19 korrik nga ekspertët e Ekologjisë Humane dhe rezultatet e analizës treguan devijime nga parametrat e kërkuar për siguri shëndetësore.
“Rezultatet e këtyre mostrave, të lëshuara me 22 korrik 2025, treguan se parametrat mikrobiologjikë nuk plotësuan standardet për ujin e pishinës,” thuhet në njoftimin zyrtar.
Inspektorati Sanitar i Ministrisë së Shëndetësisë ka zhvilluar një vizitë në pishinën e Gërmisë në të njëjtën ditë, ndërkohë që më 23 korrik janë marrë mostra të reja për analizë. Rezultatet përfundimtare të këtyre mostrave pritet të publikohen të premten, më 25 korrik 2025.
IKSHPK ka bërë të ditur se qytetarët do të njoftohen menjëherë përmes kanaleve zyrtare, sapo rezultatet e reja të jenë të gatshme.
