Drejtori Ekzekutiv i Asociacionit të Komunave të Kosovës, Sazan Ibrahimi ka folur për humbjen e komunave nga falja e 100 eurove të tatimit në pronë.
Sipas Ibrahimit, me miratimin e ligjit të ri Qeveria e Kosovës e ka hedhur topin te komunat për faljen e atyre 100 eurove, por sipas tij, komunat do të kenë humbje të mëdha financiare.
“Në këtë ligj aty shkruan që komunat mund të bëjnë faljen e 100 eurove, jo Qeveria dhe kështu do me thënë niveli qendror topin e ka hedhur te komunat, dhe tash vendimmarrjen ua ka lënë komunave. Do me thënë komuna do të vendosë, për këtë arsye nëse Qeveria mendon që është mirë t’i falen qytetarëve nga 100 euro, atëherë pse nuk e ka marrë këtë vendim dhe të vendosë siç ka ndodhur në të kaluarën kur qeveritë e Republikës së Kosovës kanë marrë vendime që të bëhet falja, psh e borxheve në të kaluarën të ndërmarrjeve publike”, tha ai në emisionin “Ditari” në Tëvë1.
Ibrahimi përmendi kohën kur në krye të qeverisë ishte Isa Mustafa, e që sipas tij, kur ishte vendosur të bëhej një falje e tillë ndaj ndërmarrjeve publike, Qeveria kishte marrë barrën e përgjegjësisë.
“Edhe pastrimin psh e paguan ajo është kompani komunale, do më thënë ato të hyrat për te çështja e mirëmbajtjes shkojnë te komunat. Në kohën kur ka qenë kryeministër Isa Mustafa, është vendosur që të bëhet një falje e tillë e borxheve ndaj ndërmarrjeve publike në këtë rast edhe lokale, do me thënë Qeveria ka vendos dhe Qeveria e merr barrën e përgjegjësisë, e jo në këtë rast komunës t’i lihet kjo, sepse komunave do t’u shkaktojë shumë humbje financiare”, tha Ibrahimi.
Tutje ai tregoi se sa ky vendim do t’u shkaktonte humbje financiare disa prej komunave më të mëdha.
“Komuna e Prishtinës nga ky vendim mund të humbasë 6 milionë euro, Komuna e Ferizajt, 2 milionë e gjysmë, Komuna e Pejës deri në 2 milionë, e Gjilanit gjithashtu. Do me thënë janë komunat e mëdha të cilat do të atakohen në shumicën e rasteve, mirëpo nuk është mirë edhe për komunat rurale”, shtoi tutje ai.
Ndryshe, Kuvendi i Kosovës ka miratuar në lexim të dytë ndryshimin e Ligjit për Pronën e Paluajtshme.
Nga ky ligj do të mundësohet zbritja prej 100 euro në faturat e tatimit në pronë për vitin 2023.
Sipas Ministrisë së Financave, përmes këtij ligji mundësohen lirime tatimore për banimin primar e tokën bujqësore./teve1.info
