Prokuroria Themelore në Prishtinë, ka paraqitur kërkesë për caktimin e masës së paraburgimit, ndaj një personi i cili në cilësinë e avokatit mbrojtës të një pale, ka kërkuar dhe pranuar 8 mijë euro nga një palë në procedurë, me premtimin që këto para t’ia japë kolegjit të gjyqtarëve.
Në një komunikatë të lëshuar për medie, thuhet se me pranimin e këtyre parave, pretendohej që të njëjtit të nxjerrin vendim në favor të palës së mbrojtur nga i pandehuri.
“Prishtinë, 9 qershor 2023, Prokuroria Themelore në Prishtinë, ka paraqitur kërkesë për caktimin e masës së paraburgimit në gjykatën kompetente, ndaj të pandehurit H.J., për shkak të veprës penale “Ushtrimi i ndikimit”, nga neni 424 paragrafi 1, lidhur me nenin 77 të KPRK-së. I pandehuri i lartcekur është ndaluar me urdhër të Prokurorit të Shtetit më 08.06.2023, pas veprimeve hetimore të ndërmarra në koordinim me Policinë e Kosovës, Drejtorinë për Hetimin e Krimeve Ekonomike dhe Korrupsionit, pasi dyshohet se i njëjti në cilësinë e avokatit mbrojtës të një pale ka kërkuar dhe pranuar para në shumën prej 8000 (tetë mijë) euro nga një palë në procedurë pranë Gjykatës Themelore në Gjilan, me premtimin që këto para t’ia jap kolegjit të gjyqtarëve, në mënyrë që të njëjtit të nxjerrin vendim në favor të palës së mbrojtur nga i pandehuri”, thuhet në komunikatë.
Më tej, thuhet se prokurori i çështjes në koordinim me Policinë janë duke vazhduar ndërmarrjen e veprimeve hetimore për të ndriçuar në plotësi këtë rast./teve1.info/.
