Viti 2023 për të ishte i mbarë. Kjo pasi për herë të parë, Betim Brogovina, bënë punën në profesionin e tij, e që është psikolog shkolle.
“Për mu viti 2023 ka qenë një prej viteve më të mbara sepse këtë vit kam fillu punë, procedurat e pranimit kanë kalu në vitin e kaluar por si procedurë fillim i punës kam fillu punë si psikolog i shkollës “Nexhmi Mustafa”, tha ai.
Ai tregon se si ishte ndjerë në momentin kur është pranuar në këtë punë.
“Ditët e para kanë qenë diqysh me pritje me një dozë të ankthit të pritjes prej asaj frikës së qysh kam me u prit, qysh kam me u gjend në një mes në një rreth ku nuk e kom njofto më herët askënd, pastaj pritja e kolegëve duke fillu prej sekretarit e shtëpiakut e më pas te drejtoresha dhe kolegët dhe deri tek punëtorët teknik të shkollës”, pohoi ai.
Por, për Betimin udhëtimi deri te shkolla është i vështirë. Ai nuk mund të përdorë transportin publik, por gjithmonë shoqërohet deri të puna nga një familjar.
“Udhëtoi zakonisht me motrën, ajo më dërgon mu niher në punë dhe pastaj vazhdon në punë të vet. Përndryshe transport të organizuar me përdor transportin publik e gjana tjera vështirësohet shumë për arsye se duhet mi ndërru 3 deri në 4 mjete të transportit për me shku deri te puna”.
Ky nuk është suksesi i vetëm i Betimit. Në këtë vit ai botoi tetë libra në formatin braile dhe akustik.
“Këta 8 libra kanë qenë të botum në formatin tipik prej vitit 2004 deri në vitin 2018, plot 14 vite të veprimtarisë letrare. Dëshirën që me pas në formatin braile për persona të verbër për shokë dhe shoqet e mia ka qenë që në pranverën e vitit 2004 kur kemi tentu por në atë kohë nuk është që ka pas as edhe printer të formatit braile në Kosovë”.
E për vitin 2024, ai uron që njerëzit t’i arrijnë qëllimet e tyre dhe t’i realizojnë ëndrrat e tyre.
Kronika e realizuar nga Rinesa Osmanaj