Policia e Kosovës ka njoftuar se, përmes Drejtorisë për Bashkëpunim Ndërkombëtar Policor dhe në koordinim me institucionet relevante të drejtësisë, është realizuar transferimi i një të dënuari nga Shqipëria në Kosovë.
Sipas njoftimit, bëhet fjalë për shtetasin kosovar me inicialet R.F., i cili ishte dënuar në Shqipëri për veprën penale “trafikim i armëve dhe municionit në bashkëpunim”.
“Me datën 12.05.2026 është transferuar nga Shqipëria për në Kosovë, shtetasi i Kosovës R.F., i dënuar në shtetin e Shqipërisë për veprën penale: ‘trafikim i armëve dhe municionit në bashkëpunim’, parashikuar nga neni 287/a i Kodit Penal të Republikës së Shqipërisë”, thuhet në njoftim.
Tutje bëhet e ditur se pas transferimit, i dënuari i është dorëzuar Shërbimit Korrektues të Kosovës për vuajtjen e pjesës së mbetur të dënimit.
“Pas transferimit, i njëjti i është dorëzuar Shërbimit Korrektues të Kosovës për të vuajtur pjesën e mbetur të dënimit prej 3 vjet e 9 muaj burgim dhe 28 ditë burgim”, thuhet më tej në njoftim.
Sipas Policisë, transferimi është realizuar përmes pikës kufitare në Vërmicë, nën masa të rrepta sigurie, ndërsa është vlerësuar si rezultat i bashkëpunimit ndërinstitucional mes Kosovës dhe Shqipërisë.
