Një i burgosur është gjetur i vdekur të enjten në Qendrën Korrektuese të Dubravës, kanë bërë të ditur autoritetet përgjegjëse.
Sipas njoftimit të Shërbimit Korrektues të Kosovës dhe Departamentit Shëndetësor të Burgjeve, rasti ka ndodhur në Pavijonin D, ku janë të vendosur personat me nevoja të veçanta.
“Shërbimi Korrektues i Kosovës dhe Departamenti Shëndetësor i Burgjeve njoftojnë opinionin publik se sot në Qendrën Korrektuese të Dubravës, në Pavijonin D ku janë të vendosura personat me nevoja të veçanta, zyrtarët korrektues kanë hasur në një rast të vetëvarjes së të burgosurit me inicialet K.N.”, thuhet në njoftim.
Sipas autoriteteve, menjëherë pas evidentimit të rastit, zyrtarët korrektues dhe personeli mjekësor kanë reaguar me urgjencë duke ofruar ndihmën e parë, ndërsa i burgosuri është transportuar për trajtim në Spitalin Rajonal në Pejë.
“Pavarësisht përpjekjeve të stafit korrektues dhe personelit mjekësor, i burgosuri ka ndërruar jetë”, thuhet më tej në njoftim.
Lidhur me rastin janë njoftuar Policia e Kosovës dhe prokurori kompetent, ndërsa Shërbimi Korrektues i Kosovës dhe Departamenti Shëndetësor i Burgjeve kanë iniciuar procedurat hetimore dhe administrative për sqarimin e plotë të rrethanave të rastit.
