Ish-ushtruesi i detyrës së ministrit të Mjedisit, Planifikimit Hapësinor dhe Infrastrukturës, Hysen Durmishi, ka bërë të ditur se nuk do të jetë pjesë e listës së kandidatëve për deputetë të Lëvizjes Vetëvendosje në zgjedhjet e 7 qershorit.
Sipas Durmishit, vendimi është marrë me kërkesën e tij dhe pas konsultimit me kryeministrin në detyrë dhe kryetarin e LVV-së, Albin Kurti.
“Me kërkesën time dhe pas konsultimit me Kryeministrin Albin Kurti, kam vendosur që të mos jem pjesë e listës në këto zgjedhje.
E falënderoj Kryeministrin për mirëkuptimin dhe mbështetjen”, ka shkruar Durmishi në Facebook.
Ai ka shprehur bindjen se LVV-ja do të dalë fituese në zgjedhje, duke shtuar se angazhimi i tij do të vazhdojë për fitoren e subjektit politik.
“Jam i bindur se Lëvizja VETËVENDOSJE!, do të dalë bindshëm fituese në këto zgjedhje, madje me rezultat edhe më të madh se ai i 28 dhjetorit të vitit të kaluar. Angazhimi im do të jetë maksimal për fitoren e madhe që na pret. Prandaj, i ftoj të gjithë ata që më kanë mbështetur mua, si dhe çdo qytetar pa dallim, për mobilizim dhe angazhim të përbashkët drejt fitores sonë”, ka përfunduar ai./teve1.info/
