Gjatë intervistës në emisionin “ResPublika”, në tëvë1, Hoxhaj tha se partnerët ndërkombëtar do të duhej të ofrojnë anëtarësimin e Kosovës në NATO nëse Serbia refuzon marrëveshjen finale.
“Nëse partnerët tanë kanë vullnet që ta mbështesin Kosovën, por është Serbia është ajo e cila e refuzon Kosovën, unë mendoj që Perëndimi do të duhej të ofrojë anëtarësim të Kosovës në NATO dhe kjo do të ishte e ngjashme me situatat historike që kemi pasur deri më tash, ne kemi marrë pjesë në konferencën e Rambujes, serbët e kanë refuzuar, ne kemi pranuar, e kemi marrë kontratën e parë me perëndimin dhe ajo ka qenë liria jonë. Ne kemi negociuar në Vjenë, serbët e kanë refuzuar Pakon e Ahtisarit, ne kemi pranuar dhe e kemi shpallur Kosovën e pavarur dhe nëse ndodhë herën e tretë e njëjta gjë mendoj se do të ishte jetike për Kosovën që t’i ofrohet, që t’i hapet rruga e anëtarësimit në NATO”, tha ai.
Tutje deputeti i PDK-së, tha se Kosova duhet ta përdor gjendjen e javëve të fundit si mundësi për të krijuar një arkitekturë të re të sigurisë për t’u anëtarësuar në NATO.
“Prandaj unë e shoh si jetike që Kosova ta përdorë gjendjen e javëve të fundit si një mundësi për të krijuar një arkitekturë të re të sigurisë së Kosovës duke anëtarësuar Kosovën në NATO për të marrë vulën e identitit Euroatlantik të shtetësisë së Kosovës dhe kjo do ta bënte mandej totalisht jo relevante qëndrimin e Serbisë se a e njeh Serbia Kosovën”, shtoi ai.
Më tej Hoxhaj tha se marrëveshja e paqes mund të arrihet vetëm nëse Serbia e njeh Kosovën dhe nëse arrihet një marrëveshje e cila në thelb ka njohjen e ndërsjellë e cila sipas tij do të ofronte normalizim të plotë të raporteve./Teve1.info/
