Hoxhaj në Facebook ka shkruar se është hera e dytë që kryeministri Kurti po flet rreth një lufte të mundshme në mes Kosovës dhe Serbisë.
Sipas tij, nëse ka sinjale të tilla atëherë Kurti do të duhej ta njoftonte opozitën dhe partnerët .
“Gjatë kësaj jave Kryeministri Kurti dy herë foli për një luftë të mundshme mes Kosovës dhe Serbisë! Javën tjetër Kurti takohet me Vuçiqin në Bruksel! Çfarë kuptimi ka dialogu dhe diplomacia në tavolinë kur në terren po kërcënohemi me luftë? Nëse situata qenka kaq serioze, atëherë do të duhej të mblidhet Kuvendi dhe jo të shkojë kryeministri në Bruksel. Nëse ka ndonjë sinjal për situata serioze, Kurti duhet ta njoftojë opozitën dhe partnerët. Nëse nuk është reale mundësia e luftës, atëherë kush investon në një Kosovë nëse është në gjendje lufte? Kush e njeh më?”, ka shkruar ai.
Sipas tij, kryeministri Kurti dhe presidentja Osmani e kanë për detyrë të thërrasin një mbledhje urgjente për të diskutuar rreth sigurisë në vend.
“Sipas Kushtetutës, Kryeministri dhe Presidenti i Republikës kanë për detyrë të thërrasin mbledhjen urgjente të Kuvendit të Kosovës çdoherë kur kanë informacione të besueshme se ka rrezik të drejtëpërdrejtë për luftë dhe konflikt të armatosur, kur rrezikohet siguria dhe mbrojtja e vendit, jeta dhe prona e qytetarëve. Çfarë mënyre komunikimi është kjo e parisë institucionale kur flasin për luftë e nuk zbatojnë detyrat kushtetuese që kanë ndaj vendit dhe qytetarit?”, shtoi ai.
Ndryshe kryeministri Albin Kurti dhe presidenti serb, Aleksandër Vuçiq, do të takohen më 18 gusht në Bruksel. /teve1.info.
