Duke folur për takimin trepalësh që po vazhdon akoma në Ohër, profesori universitar, Abit Hoxha theksoi se pritjet e tij janë skeptike.
Ai beson se palët do të mirren vesh në parim.
“Pritjet e mia për këtë ngjarje janë fatkeqësisht skeptike, për shkak se edhe dokumenti, edhe dizajni i këtij takimi nuk është se do të ketë një ngjarje finale, ose një ngjarje ashtu kulminante, por besoj që palët do të mirren vesh në parim…dhe do të përfshihen disa vjet në implementimin e këtyre parimeve”, deklaroi ai në një lidhje direkte në Edicionin Special në Tëvë 1.
Sipas Hoxhës, as Kosova e as Serbia nuk kanë shkuar në këtë takim me vullnet të plotë. Ai potencon se asnjëra palë nuk kanë ndonjë interes për të këtë marrëveshje.
“Unë mendoj se edhe pala kosovare, dhe pala serbe, aty nuk kanë shkuar me vullnetin e tyre të plotë të them ashtu, për shkak se nuk kanë pasur një interes. Pala kosovare nuk ka interes ta nënshkruajë një marrëveshje ose të pajtohet me një marrëveshje që e sjell një bashkësi të komunave brenda për brenda Kosovës, ndërsa pala serbe në një farë forme nënshkruan humbjen e Kosovës në thojza, për publikun serb”, shtoi ai.
Takimi trepalësh në Ohër mes kryeministrit të Kosovës, Albin Kurti dhe presidentit të Serbisë, Aleksandar Vuçiq, po vazhdon akoma nën ndërmjetësimin e përfaqësuesve evropianë. /Teve1.info/
