Deputeti i Lidhjes Demokratike të Kosovës, Avdullah Hoti ka reaguar lidhur me situatën institucionale në vend, duke kërkuar që çështja e moskonstituimit të Kuvendit të dërgohet urgjentisht në Gjykatën Kushtetuese.
Hoti ka deklaruar se ruajtja e kushtetutshmërisë duhet të jetë mbi çdo interes elektoral, ndërsa ka akuzuar partinë e parë në zgjedhje se, sipas tij, ka pamundësuar konstituimin e Kuvendit brenda afatit kushtetues.
“Ruajtja e kushtetutshmërisë për mua është mbi çdo interes elektoral”, ka shkruar Hoti.
Sipas tij, moskonstituimi i Kuvendit brenda afatit prej 30 ditësh nga certifikimi i rezultateve të zgjedhjeve bie ndesh me aktgjykimin e Gjykatës Kushtetuese.
Hoti ka kritikuar edhe deputetët që, sipas tij, po e pamundësojnë konstituimin e Kuvendit, duke thënë se me këtë veprim po shkelet betimi i dhënë më 6 gusht për mbrojtjen e kushtetutshmërisë dhe ligjshmërisë.
Ai ka theksuar se edhe mosveprimi për adresimin e kësaj situate në Gjykatën Kushtetuese përbën, sipas tij, shkelje të betimit të deputetëve.
Deputeti i LDK-së ka kërkuar që Gjykata Kushtetuese të japë një zgjidhje për situatën, veçanërisht për rastin kur partia e parë në zgjedhje nuk e shfrytëzon të drejtën për të propozuar kandidatin për kryetar të Kuvendit.
Hoti ka ngritur shqetësime edhe për funksionimin e institucioneve të tjera të vendit. Ai ka thënë se Kosova aktualisht ka ushtrues detyre të Presidentit me mandat të kontestuar pas 6 gushtit, ndërsa kryeministri dhe ministrat në detyrë, sipas tij, po ushtrojnë detyrat në mënyrë të kundërligjshme pasi kanë dhënë betimin si deputetë.
“Por ruajtja e kushtetutshmërisë është para çdo interesi elektoral. Çështja duhet dërguar urgjentisht në Gjykatën Kushtetuese”, ka deklaruar Hoti./teve1.info/
