Avdullah Hoti, deputet i Lidhjes Demokratike të Kosovës, ka thënë se Ministria e Financave ka thënë se mosekzekutimi i pagave për punëtorët e sektorit publik është neglizhencë e detyrave ligjore nga kjo ministri.
Ai në një postim në Facebook, ka thënë se ministri Murtati është dashur të informojë qytetarët për vonesat dhe arsyen.
Sipas tij, pozitat me ushtrues detyre po shkon në dëm të zyrtarëve shtetëror dhe gjithë administratës.
“Ministri i Financave edhe të dielën ishte shumë i angazhuar me inxhiniering të shifrave ekonomike për të portretizuar mesazhet politike, të cilat atij dhe ministrave të tjerë ua dikton partia. Por, nuk e kishte idenë se ditën tjetër nuk do të ekzekutoheshin pagat për rreth 85 mijë zyrtarë në sektorin publik. Kjo sjellje është neglizhencë ndaj detyrave ligjore që ka Ministri i Financave. Më e pakta që ai do të duhej të bënte është informimi paraprak se pagat nuk do të ekzekutohen, si dhe sqarimet për arsyet dhe hapat e ndërmarrë për zgjidhjen e çështjes. Tendenca për të vendosur kontrollin mbi administratën shtetërore, duke lënë me ushtrues detyre pozitat kryesore po shkon në dëm të zyrtarëve shtetërorë dhe gjithë administratës. Si mund të mbajnë shtet këta kur bëjnë lëshime të tilla?”, ka shkruar ai.
