Sot në mbrëmje do të përcaktohet finalisti i dytë i Kampionatit Evropian “Gjermania 2024”.
Në gjysmëfinalen e dytë që nis në orën 21:00 dhe luhet në Dortmund, do të përballen Holanda dhe Anglia.
Edhe kjo ndeshje pritet të jetë interesante, ndonëse Anglia në krahasim me Holandën nuk ka treguar paraqitje të mira deri më tani në “Euro 2024”.
Anglezët synojnë fillimisht të përsërisin suksesin e Evropianit të shkuar, në të cilin arritën në finale dhe pastaj ta mposhtin Spanjën për t’i dhënë fund pritjes prej 58 vjetësh për një trofe të rëndësishëm.
Triumfi i vetëm i Anglisë në turne të madh, datën në Kampionatin Botëror të vitit 1966, ngjarje kjo që u mbajt në Angli.
Për Anglinë, kjo është gjysmëfinalja e tretë në katër turne të mëdhenj nën drejtimin e trajnerit Gareth Southgate. Edhe Holanda mund të konsideroj veten me fat për rrugëtimin që arriti deri në gjysmëfinale duke pasur parasysh se doli e treta në Grupin D pas Francës dhe Austrisë.
Lojtari kryesor i Holandës në këtë turne po del të jetë sulmuesi i krahut, Cody Gakpo që ka shënuar tre gola dhe do të jetë rreziku më i madh për portën e Anglisë.
Për dallim prej Holandës, Anglia është vlerësuar favorite për të triumfuar në Evropian pa filluar turneu, por nuk ka treguar cilësinë që është pritur prej saj.
Mbetet të shihet se kush do t’i bashkohet Spanjës në finalen e madhe të Berlinit që luhet të dielën mbrëma, Holanda apo Anglia?
