I dërguari i SHBA-së për Kosovën gjatë kohës së luftës, Christopher Hill, ka folur për procesin e Rambujesë dhe raportet që kishte me ish-presidentin e Serbisë, Sllobodan Millosheviq. Ai ka treguar se Millosheviqi kishte përmendur me emër Hashim Thaçin gjatë takimeve të tyre dhe ishte i shqetësuar për rolin e UÇK-së në proces.
“Millosheviqi mendonte se ne po largoheshim nga [Ibrahim] Rugova dhe mendonte se ishte gabim i rëndë, sepse ai besonte se do të duhej të merrej me UÇK-në, që kishte qëndrim të ashpër,” tha Hill.
“Rugova asnjëherë nuk kërkoi më pak se pavarësinë, por ai pranoi se nuk ishte i interesuar për luftën e armatosur,” shtoi ai.
Sipas Hillit, Millosheviqi ishte i shqetësuar se SHBA-të do ta mënjanonin Rugovën dhe do ta zgjidhnin UÇK-në si partnere në bisedime.
“Pse shqetësohej për këtë, nuk jam i sigurt,” u shpreh diplomati amerikan.
“Kishte ndjesi të tilla edhe te të tjerët, madje edhe brenda SHBA-së, ku disa mendonin se duhej komunikuar më shumë me UÇK-në.”
Hill foli edhe për procesin e Rambujesë, duke theksuar se në atë kohë ishte optimist se marrëveshja do të funksiononte.
“Morëm sinjale nga shtabi i përgjithshëm i UÇK-së se e përkrahnin marrëveshjen, por kishim shqetësime se çfarë do të ndodhte në Serbi, pasi ajo nuk e nënshkroi,” tha ai.
Diplomati amerikan theksoi se pas Rambujesë, qëndrimet e palëve u ndanë qartë.
“Shqiptarët u kthyen në Kosovë për të gjetur paqe, ndërsa pas Rambujesë serbët u kthyen në Serbi për t’u përgatitur për luftë,” deklaroi Hill.
I pyetur se kush e nënshkroi marrëveshjen, Hill tha se nuk i kujtohej saktësisht, por theksoi unitetin e delegacionit kosovar.
“Ajo çfarë më kujtohet është se i gjithë delegacioni i Kosovës ishte dakord për marrëveshjen dhe ishin pozitivë për nënshkrimin në Paris. Isha shumë i kënaqur që ata, ndryshe nga më parë, në atë moment ishin në një mendje dhe të bashkuar,” tha ai.
Hill theksoi se marrëveshja e Rambujesë ishte edhe një mesazh për Serbinë, pavarësisht se ajo refuzoi ta nënshkruante.
“Marrëveshja ishte një mesazh për serbët se kjo do të ndodhë dhe është mirë që të bëhen pjesë e procesit,” theksoi ai.
Sipas tij, ky proces hodhi poshtë pretendimet e Millosheviqit se “shqiptarët nuk pajtohen për asgjë”.
“Ky ishte një mesazh i kundërt me atë që po thoshte Millosheviqi. Ne po i tregonim atij se e kishte gabim, sepse arritëm marrëveshjen. Por i thamë se do të ishte mirë që të mendonte për lëvizjen e ardhshme të Serbisë,” përfundoi Christopher Hill.
