Tashmë është e konfirmuar nga Prishtina e Beogradi që ka disa propozime që vijnë nga Parisi dhe Berlini.
Lidhur me këtë propozim, ka folur edhe eurodeputetja në Parlamentin Evropian, Viola Von Cramon.
Kjo e fundit thotë se palët e përfshira në dialog, duhet ta shqyrtojnë këtë ofertë.
Por profesori nga Westminster University, Aidan Hehir, në një intervistë dhënë për tëvë1, thotë se çdo marrëveshje eventuale duhet ta përfshijë njohjen e Kosovës nga Serbia, ose së paku që të mos kundërshtohet pavarësia e Kosovës.
“Çdo marrëveshje ndërmjet Kosovës dhe Serbisë duhet të fillojë nga parimi bazë që të dyja janë shtete. Pavarësia e Kosovës nuk kërcënon askënd. Përpjekja për ta mbajtur Kosovën në një gjendje paralize, është dritëshkurtër dhe e rrezikshme. Prandaj, çdo marrëveshje e ndërmjetësuar nga BE-ja duhet të insistojë që Serbia të njohë ose të paktën të mos e kundërshtojë pavarësinë e Kosovës”, u shpreh Hehir.
Britaniku, ka folur edhe për çështjen e targave.
Sipas tij në rast se Serbia nuk e respekton vendimin e Kosovës për targa, atëherë ajo nuk është e interesuar për paqe.
“Nëse serbët e Kosovës nuk i respektojnë rregulloret e reja të targave, kjo do të tregojë më tej se Vuçiq dhe miqtë e tij në partinë e Listës Serbe në Kosovë nuk janë seriozë për të kërkuar paqe dhe stabilitet në Kosovë. BE-ja duhet të përgjigjet me forcë nëse nuk arrihet përparim”, shtoi ai.
Hulumtuesi tutje thotë, se politika e Bashkimit Evropian ndaj Serbisë ka dështuar.
“Serbia ka nxitur destabilizim në Bosnjë, Mal të Zi dhe Maqedoninë e Veriut dhe vazhdimisht ka kërkuar të pengojë demokracinë në Kosovë përmes bandave kriminale. BE-ja duhet të pranojë se politika e saj e butë ndaj Serbisë ka dështuar dhe qeveria në Beograd përbën kërcënimin e vetëm më të madh për paqen dhe stabilitetin në rajon”,
Të mërkurën emisari special i ShBA-së për dialogun Kosovë – Serbi, Gabriel Escobar do të vijë në Prishtinë për ta mbështetur tutje këtë proces.
Kronika e gazetarit Shpat Blakçori.